မိဘပဲဖြစ်ဖြစ် ဆရာ/မပဲဖြစ်ဖြစ် ကိုယ်ပြုစုပျိုးထောင်သင်ကြားပေးနေတဲ့ ကလေးတွေကို ကလေးလို့သတ်မှတ်ရင်း မကြာခင်မှာ ကလေးတွေက အရွယ်ရောက်လာတယ်။ အချို့လုပ်ရပ်တွေကို လူကြီးတွေ လက်မခံနိုင်ကြဘူး။ အဲဒီ့အထဲက အများစု လက်မခံနိုင်ကြတဲ့ အချက်တစ်ခုက ကလေးတွေ ငယ်ငယ်နဲ့ ရည်းစားထားတဲ့ ကိစ္စလည်း ပါဝင်ပါတယ်။ ကနေဒါနိုင်ငံက စစ်တမ်းတစ်ခုမှာဆိုရင် ကလေးတွေဟာ ပျမ်းမျှ အသက် ၁၁.၈ နှစ် အရွယ်က စပြီး ရည်းစားတွေ ထားကြတယ်လို့ဆိုပါတယ်။ဆယ်နှစ် မကျော်ခင်မှာလည်း ဟိုလူ့ကို သဘောကျတယ်၊ ဒီလူ့ကို ကြိုက်တယ် စတာတွေ စပြီး ဖြစ်နေကြပါပြီ။ မိန်းကလေးနဲ့ ယောက်ျားလေး ယှဉ်ရင်တော့ ယောက်ျားလေးတွေက အသက် ပိုငယ်တဲ့ အချိန်ကတည်းက ဒီအကြောင်းတွေ စပြီး စဉ်းစားနေကြပါပြီ။ ဒါကြောင့် ကိုယ့်ကလေးတွေ ရည်းစားထားတယ်၊ ကြိုက်တဲ့သူတွေရှိနေတယ်ဆိုရင် ဘယ်လိုတွေ လုပ်ကြမလဲဆိုတာ ကျွန်မအမြင်လေးကို မျှဝေခြင်ပါတယ်။
ကလေးတွေ စိတ်ကူးယဉ်တတ်တာ၊ သဘောကျတဲ့သူရှိတတ်တာဟာ တစ်ကယ်တော့ ထူးဆန်းတဲ့ ကိစ္စမဟုတ်ပါဘူး။ တားမြစ်ထားလဲ ဖြစ်မှာပဲ။ သူတို့ပတ်ဝန်းကျင်မှာ လူအချင်းချင်း ချစ်ကြတာ၊ ကြိုက်ကြတာ ၊ တွဲကြတာ မြင်နေရတာပဲ။ ရုပ်ရှင်ထဲမှာ၊ အင်တာနက်ပေါ်မှာ စုံတွဲတွေ အကြောင်းအစုံမြင်နေရတာပဲ။ ငယ်ငယ်လေးကတည်းက လူကြီးတွေကလည်း ယောက်ျားလေး ကလေးဆိုရင် ကောင်မလေးမြင်ရင် ချစ်ချစ်လို့ခေါ်လိုက်၊ ဖက်လိုက်၊ နမ်းလိုက် စသည်ဖြင့် သင်ပေးကြတာပဲ။ ဆိုတော့ ဒီကိစ္စတွေဖြစ်လာတာ အမှန်တော့ သိပ်မဆန်းကြယ်လှပါဘူး။ ဖြစ်လာပြီ ဆိုရင်ရော ဆရာ၊မတွေ၊ မိဘတွေ အနေနဲ့ ဘာလုပ်ကြမလဲ။
၁) ကောင်းမွန်သော ဆက်စပ်မှု (Relationship)တစ်ခုအကြောင်း သင်ပေးပါ။
ရည်းစားထားသည်ဖြစ်စေ၊ သူငယ်ချင်းထားသည်ဖြစ်စေ - ခင်မင်မှု၊ ချစ်ခင်မှု ကြောင့် ဆက်စပ်မှုတစ်ခုစမိပြီဆိုရင် တစ်ယောက်နဲ့တစ်ယောက် အပြန်အလှန်လေးစားမှု၊ နားလည်မှု၊ ယုံကြည်မှု ရှိဖို့လိုတယ်။ တစ်ယောက်ရဲ့ အောင်မြင်မှုကိုတစ်ယောက်က တန်ဖိုးထားပြီး တစ်ယောက် ကောင်းဖို့ တစ်ယောက်က အကောင်းဆုံးပံ့ပိုးပေးကြတယ်၊ ဖြည့်စည်းပေးကြတယ် စသည်ဖြင့် ကောင်းမှုသော ဆက်စပ်မှုတစ်ခုဖြစ်ဖို့ ထားရမယ့် တန်ဖိုးတွေနဲ့ သိရမယ့် အသိပညာတွေကို အပြုသဘော မျှဝေသင့်တယ်။
၂) ဖြစ်နိုင်ခြေရှိသော အခက်အခဲ နှင့် ပြဿနာတွေကို ပွင့်လင်းစွာ ဆွေးနွေးအဖြေရှာပါ။
ရည်းစားထားခြင်းအားဖြင့် (ကိုယ်လုပ်ချင်တာ လုပ်လိုက်ရတဲ့အတွက်) စိတ်ပိုင်းဆိုင်ရာ ကျေနပ်မှု တစ်ခုရကောင်းရလိမ့်မယ်။ ဒါပေမယ့် ကျောင်းနေတဲ့ အရွယ်မှာဖြစ်လာနိုင်တဲ့ အကျိုးဆက်တွေ ရှိနိုင်တယ်။ ဥပမာ ကျောင်းလစ်ပြီး ချိန်းတွေ့လို့ ကျောင်းစာတွေ မမှီတာမျိုး၊ ရည်းစားအကြောင်းပဲတွေးနေလို့ စာမလုပ်နိုင်တာမျိုး၊ ရည်းစားခိုင်းတာလုပ်နေရလို့ ဒါမှမဟုတ်လည်း ရည်းစားကို အချိန်ပေးနေလို့ စာကို မလေ့လာဖြစ်တော့တာမျိုး၊ အခြားသူငယ်ချင်းတွေနဲ့ စကားသိပ်မပြောဖြစ်တော့တာမျိုး .. စသည်ဖြင့် ဖြစ်တတ်တဲ့အတွက် အဲ့လိုမျိုးအခြေအနေတွေ ဖြစ်မလာအောင် ဘယ်လိုတွေ လုပ်မလဲ။ ဖြစ်လာခဲ့ရင် ဘာတွေ ဆက်လုပ်မလဲဆိုတာတွေကို ပွင့်ပွင့်လင်းလင်းနဲ့ အပြုသဘောဆွေးနွေးဖို့လိုပါတယ်။
၃) လိင်ပိုင်းပိုင်းဆိုင်ရာ ပညာပေးမှုတွေပြုလုပ်ပေးပါ။
မြို့ကြီးပြကြီးတွေမှာ ဆယ်ကျော်သက်တွေတောင် ဟိုတယ်တွေ၊ တည်းခိုခန်းတွေကိုလာပြီး အတူနေကြတာတွေ သိရပါတယ်။ ဒီတိုင်းနေရင် ရှက်စရာကိစ္စတွေဆိုပြီး ပွင့်ပွင့်လင်းလင်း ဆွေးနွေးမှုတွေမရှိထားတော့ ဖြစ်ချင်သလိုတွေဖြစ်ကုန်ရတယ်။ ဆယ်ကျော်သက်တွေကို လိင်ပိုင်းဆိုင်ရာ ပညာပေးတွေ လုပ်ပေးဖို့လိုပါတယ်။ ငယ်သေးလို့ ဆိုပြီး မသင်ဘဲထားလို့မရပါဘူး။ ဆယ်ကျော်သက်အရွယ်မှာ သူတို့အဆင့်အလိုက် သိထားသင့်တာကို သိပေးရမယ်။ ဆောင်ရန် ရှောင်ရန်တွေကို သင်ပေးရမယ်။ သင်ပေးလိုက်လို့ လိုက်လုပ်မှာ စိုးတာမျိုးဖြစ်နိုင်ပါတယ်။ ဒါပေမယ့် မသိထားပဲနဲ့ လုပ်တာနဲ့ သိထားပြီး အန္တရာယ်ကင်းကင်းလုပ်တာ ဘယ်ဟာကို ပိုလိုချင်သလဲဆိုတဲ့ အပေါ်မှာ မူတည်ပြီး သင်တာမသင်တာကို ဆုံးဖြတ်ပေါ့။
၎) စည်းမျဉ်းတွေ အတူတူချပါ။
ဟိုဟာ မလုပ်ရ ဒီဟာမလုပ်ရဆိုတာမျိုးတွေက လူကြီးတွေက ကလေးတွေကိုပဲ ပြောကြတယ်။ အမှန်က ကလေးတွေကို နားလည်အောင် ပြောဆိုပြီး သူတို့နဲ့အတူ သူတို့လိုက်နာနိုင်မယ့်၊ လိုက်နာရမယ့်၊ လိုက်နာသင့်တဲ့ စည်းမျဉ်းတွေ၊ ဘောင်တွေကို ဆွေးနွေးပြီး သတ်မှတ်ဖို့လိုပါတယ်။ ချမှတ်တာတွေထဲမှာ ကလေးတွေလုပ်ရမှာတွေပါသလို လူကြီးတွေ လုပ်ဆောင်ပေးရမယ့်ဟာတွေလည်း မျှမျှတတ ထည့်သွင်းပြီး သေသေချာချာ ကိုယ်တိုင်ကစ လိုက်နာပါ။
၅) အပြုသဘောဆောင်သော ဆွေးနွေးမှု၊ ဘက်မျှပြီး ပွင့်လင်းသော ဆွေးနွေးမှုကို ဖေါ်ဆောင်ပါ။
ကလေးတွေဟာ သူတို့ရဲ့ သူငယ်ချင်းတွေအပေါ်ဖွင့်ပြောပြတာနဲ့ မိဘအပေါ်ဖွင့်ပြောပြတာနဲ့ ယှဉ်ရင် သူငယ်ချင်းတွေ အပေါ် ဖွင့်ပြောပြတာ ပိုများတယ်။ မိဘတွေဟာ အုပ်ထိန်းသူတွေ၊ ဆရာ၊မတွေဟာ သင်ကြားသူတွေဆိုတော့ ပြောပြဖို့ မရဲတာတို့၊ ပြောပြလေ့မရှိလို့ မပြောပြတာမျိုးတွေ ဖြစ်နိုင်တဲ့အတွက် ကလေးတွေက ကိုယ့်ကို သူတို့ရဲ့ အတွင်းရေးတွေ တိုင်ပင်နိုင်အောင် အပြုသဘောဆောင်သော၊ ဘက်မျှသော၊ ပွင့်လင်းသော ဆွေးနွေးမှုတွေ ဖန်တီးပါ။
၆) လေးစားစွာ နားထောင်ရင်း အကြံပြုပါ။
အချက် (၅)မှာလိုမျိုးပဲ ဆွေးနွေးမှုတွေလုပ်ဖို့ဆိုရင် ကိုယ်က ကလေးတွေကို အမှန်တစ်ကယ် နားထောင်ပြီး သူတို့ရဲ့ အမြင်တွေကို လေးစားကြောင်း ကလေးတွေ ခံစားမိမှ ကိုယ့်အကြံပြုချက်တွေ၊ ကိုယ်ပြောချင်တာတွေကို သူတို့ကလည်း နားထောင်မှာပါ။ ဒါကြောင့် သူတို့လည်း သူတို့ သိထားတာ၊ တတ်ထားတာရှိတယ်၊ သူတို့ အသက်အရွယ်နဲ့ သူတို့ အတွေ့အကြုံပေါ်က ထွက်လာတဲ့ အမြင်တွေကိုလည်း လေးစားမယ်ဆိုတဲ့ စိတ်ကလေးနဲ့ချဉ်းကပ်ဖို့လိုပါတယ်။
အချုပ်မှာတော့ ကျွန်မတို့နေထိုင်နေတဲ့ ပတ်ဝန်းကျင်မှာ ကလေးတွေအတွက် ကောင်းတာရော မကောင်းတာရော သင်ယူစရာတွေ ပြည့်နေတယ်။ ကောင်းတယ် မကောင်းဘူးဆိုတာ ကျွန်မတို့ရဲ့ အဓိပ္ပါယ်ဖွင့်မှုပေါ်မှာလည်း မူတည်ပေမယ့် ကလေးတွေကတော့ အကုန်သင်မှာပဲ။ အင်တာနက်ခေတ်မှာ တားမရနိုင်တဲ့ ကိစ္စတွေ ရှိတာကြောင့် ကြိုတင်ပြီး ကိုယ့်ကလေးတွေကို သိထားသင့်တာတွေ သင်ပေးဖို့၊ ကလေးတွေမှာ ဖြစ်ပျက်နေတာတွေကို နားထောင်ပြီး အပြုသဘော အကြံပေးဖို့၊ ကလေးတွေအတွက် ရှိနေပေးတယ်ဆိုတဲ့ အသိစိတ် ကလေးတွေ မြင်နိုင်ဖို့ လူကြီးတွေ အနေနဲ့ ကြိုးပမ်းဖို့လိုလာပါပြီ။ အရင်တုန်းကလို အိမ်တွင်း အောင်ခိုင်းပြီးထားလို့ဖြစ်တဲ့ခေတ်မဟုတ်တော့တာ သိရင် ခေတ်အလိုက် စည်းမျဉ်းချပုံတွေ၊ ကလေးတွေနဲ့အပြန်အလှန် ဆက်သွယ်ပုံတွေလည်း လိုက်လျော်ညီထွေဖြစ်အောင် ပြုပြင်ပါမှ ကလေးတွေကို ကျွန်မတို့တစ်တွေက အများကြီး ပံ့ပိုးပေးနိုင်မှာလို့ ကျွန်မမြင်ပါတယ်။ အပြုသဘောဆောင်သော အနာဂါတ်ကို ဖေါ်ဆောင်ဖို့ ဒီစာလေးက အထောက်အပံ့ဖြစ်နိုင်ပါစေလို့ ဆန္ဒပြုရင်း။
မေတ္တာဖြင့်…
credit to Sayarma-ဆရာမ
No comments:
Post a Comment