မိုင်းပွန်စော်ဘွားကြီးလို့ ဆိုလိုက်လျှင် ဇူလိုင် ၁၉ တွင် ဗိုလ်ချုပ်အောင်ဆန်းနှင့် အတူကျဆုံးသွားခဲ့သော အာဇာနည်ခေါင်းဆောင်တစ်ဦးဆိုတာ အားလုံးသိပြီးဖြစ်မှာပါ။ မိုင်းပွန်စော်ဘွားကြီးရဲ့ရုပ်ကလာပ်နဲ့ ပတ်သတ်ပြီးလူသိနည်းတဲ့ဖြစ်ရပ်တစ်ခု ရှိခဲ့ပါတယ်။
မိုင်းပွန်စော်ဘွားကြီးစဝ်စံထွန်းကို မိုင်းပွန် စော်ဘွားကြီး စဝ်ခွန်ထီးနှင့် မြောက်နန်းဆောင် မဟာဒေဝီ နန်းစိန်ဥ တို့က ၁၉၀၇ခုနှစ် မေလ ၃၁ရက်နေ့မှာ ဖွားမြင်ခဲ့ပါတယ်။
၅နှစ်သားတွင် တရားမစာရေးကြီး ဦးစံဖေထံတွင် မြန်မာ၊ အင်္ဂလိပ်အခြေခံများကို ၂နှစ်ကြာသင်ယူခဲ့ပါတယ်။ တောင်ကြီးမြို့ရှမ်းစော်ဘွားများကျောင်းမှ ၁၀တန်း အောင်မြင်ခဲ့ပါတယ်။
ထို့နောက် မိတ္ထီလာမြို့ စက်ရှင်တရားသူကြီး ဦးကျောက်တိုင်ရုံး၌ ၆ လ အလုပ်သင် လုပ်ခဲ့ပြီး မန္တလေးမြို့ ရဲအုပ်သင်တန်းကျောင်းတွင် ၆-လတက်ရောက်ခဲ့ပါတယ်။
ရဲအုပ်သင်တန်း ဆင်းပြီးတဲ့အခါ ဗန်းမော်မြို့တွင် အလုပ်သင် ရဲဝန်ထောက်အဖြစ် ခေတ္တ ဆောင်ရွက်ခဲ့ပြီး ထိုမှတဖန် တောင်ကြီးမြို့ ရှမ်းပြည်မင်းကြီးရုံတွင် အလုပ်လုပ်ခဲ့ပါတယ်။
၁၉၂၈ခုနှစ် ဇွန်လ ၂၀ ရက် (ဝါဆိုလဆန်း ၁၁-ရက်) နေ့တွင် အခမ်းအနားဖြင့်စော်ဘွား ရာထူးဆက်ခံရသည်မှ မိုင်းပွန်စော်ဘွားဟု အမည်တွင်ခဲ့ပါတယ်။ အဲဒီအချိန်က စော်ဘွားကြီးရဲ့အသက်ဟာ ၂၁နှစ်ပဲ ရှိပါသေးတယ်။
မိုးမိတ်စော်ဘွားကြီး၏ သမီးစဝ်ခင်သောင်းနှင့် ပေါင်းဖက်ကာ သားသမီး ၄ ဦး ထွန်းကားခဲ့ပါတယ်။ သူတို့ကတော့ စဝ်ဆေဟုန် နဲ့ စဝ်ကိုင်ဖဟူသော သား ၂ဦးနှင့် စဝ်သုနန္ဒာနှင့် စဝ်မြင့်ကြည် ဟူသော သမီးနှစ်ဦး တို့ဖြစ်ကြပါတယ်။
အခြားစော်ဘွားများကဲ့သို့ ဇနီးအများအပြား မထားရှိဘဲ ဇနီးတစ်ဦးသာ ရှိပါတယ်။
စော်ဘွားကြီးသည် စာဖတ်ခြင်း ၊ အကော်ဒီယံခေါ် လက်ဆွဲဘာဂျာနှင့် ပတ္တလားတီးခြင်း ၊ သိုင်းလေ့ကျင့်ခြင်းတို့ကို အလွန်နှစ်သက်ပါတယ်။ အရက်သေစာ ၊ ကွမ်း ၊ ဆေးလိပ်များကို လုံးဝရှောင်ကြဉ်သူဖြစ်ပါတယ်။
ကျန်းမာရေးကိုအထူးလိုက်စားပြီး တင်းနစ်၊ ခရစ်ကက်၊ ဟော်ကီနှင့် ဘောလုံး စတဲ့ကစားနည်းများကို ကစားခဲ့ပါတယ်။ ဘောလုံးအားကစားနည်းတွင် အထူးကျွမ်းကျင်သူဖြစ်ပြီး ဂိုးစောင့် နှင့် လက်ဝဲဝင်းအဖြစ်နာမည်ကြီးခဲ့ဖူးပါတယ်။
ပေါင်းသင်းဆက်ဆံရေးတွင်လည်း အလွန်ပြေပြစ်သူဖြစ်သလို ရှမ်းပြည်သူများအား ဂျပန်တို့၏ဖိနှိပ်မှုမှ ရဲရဲဝံ့ဝံ့ဆန့်ကျင့်ဝံ့သူလည်းဖြစ်ပါတယ်။ ရှမ်းပြည်နယ်တွင် သိပ္ပံနည်းကျစိုက်ပျိုးရေးထွန်းကားလာစေရန် နိုင်ငံတကာမှ ခေတ်မီစာအုပ်များ ၊ ကိရိယာ တန်ဆာ ပလာများကို ၀ယ်ယူကာ ကြိုးပမ်းခဲ့သူလည်း ဖြစ်ပါတယ်။
စစ်မဖြစ်မီကပင် လူနာ ၆၀ ဆန့် ခေတ်မှီဆေးရုံကြီးကိုလည်း ကိုယ်တိုင်ကြပ်မတ်ကာ အစဆုံးတည်ဆောက်ခဲ့ ပါတယ်။
ဒုတိယကမ္ဘာစစ်ကြီး ပြီး၍ အင်္ဂလိပ်များ မြန်မာနိုင်ငံသို့ ပြန်ဝင်လာသော် ယင်းနှင့် အတူ ပါလာသော စက္ကူဖြူအုပ်ချုပ်ရေးကို ဆန့်ကျင်ခဲ့သူ ဖြစ်ပါတယ်။
ကမ္ဘာ့အခြေအနေ၊ မြန်မာ့အခြေအနေ၊ တောင်းတန်းဒေသအခြေအနေတို့ကို ကွက်ကျော်မြင်ပြီး အင်္ဂလိပ်တို့၏ တောင်တန်းနှင့် မြေပြန့် သွေးခွဲ၍ အုပ်ချုပ် သည်ကို မလိုလား၍ မြေပြန့်နှင့် တောင်တန်း စည်းလုံး ညီညွတ်ရေး အတွက် လုံးပမ်းခဲ့သူ ဖြစ်ပါတယ်။
၁၉၄၆ခုနှစ် နိုဝင်ဘာလမှ စ၍ ဗိုလ်ချုပ်အောင်ဆန်းနှင့် ရင်းနှီးစွာဆောင်ရွက်လာခဲ့ပြီး တောင်တန်း-မြန်မာ ပူးပေါင်းသည့် ပင်လုံစာချုပ်တွင် ပါဝင်လက်မှတ်ရေးထိုးခဲ့ပါတယ်။
၁၉၄၆ ခုနှစ် မတ်လ ၂၆ ရက်မှ စ၍ တောင်တန်းဒေသ အတိုင်ပင်ခံဝန်ကြီးဖြစ်လာခဲ့ပါတယ်။ နိုင်ငံနှင့် လူမျိုးအကျိုးကို အစွမ်းကုန်ထမ်းရွက်နေစဉ် ၁၉၄၇ခုနှစ် ဇူလိုင် ၁၉တွင် ဗိုလ်ချုပ်တို့နှင့် အတူလုပ်ကြံခံခဲ့ရပါတယ်။
လုပ်ကြံစဉ်က မိုင်းပွန်စော်ဘွားကြီးသည် သေနတ်ကျည်ဆံမှန်ခဲ့သော်လည်း ချက်ချင်းမသေသေးပဲ သွေးများပေကျံနေသော မျက်နှာနှင့် ဗိုလ်ထွန်းလှ အခန်းဘက်သို့ လမ်းလျှောက်လာနိုင်ပါသေးတယ်။
အဲဒီနေ့ကသတင်းစာတွေမှာတော့ စော်ဘွားကြီးဟာ သေနတ်ကျည်ဆံမှန်ခဲ့ပေမယ့် စိုးရိမ်စရာလုံးဝမရှိကြောင်းကြေငြာကြပါတယ်။
ဒါပေမယ့် နောက်တစ်နေ့ ဇူလိုင်လ ၂ဝ ရက် မွန်းတည့် ၁၂ နာရီမှာတော့ စော်ဘွားကြီးဟာ ကွယ်လွန်ခဲ့ပါတယ်။ အဲဒီအချိန်က စော်ဘွားကြီးရဲ့အသက်ဟာ ၄၁နှစ်ပဲ ရှိပါသေးတယ်။
အဲဒီနေ့မှာပဲ မိုင်းပွန်စော်ဘွားကြီးရဲ့ ရုပ်ကလာပ်ကို ဗိုလ်ချုပ်အောင်ဆန်းတို့နှင့်အတူ ဂျူဗလီဟောသို့ ပို့ဆောင်ထားရှိခဲ့ပါတယ်။ ရုပ်ကလပ်များကို ၉ လ ကြာ အလေးအမြတ်ပြုခဲ့ပြီး ၁၉၄၈ ခုနှစ် ဧပြီလ ၁၁ ရက် နေ့တွင် အာဇာနည်ဗိမာန်သို့ ပို့ဆောင်ဂူသွင်းခဲ့ပါတယ်။
ယင်းသို့ အာဇာနည်ပုဂ္ဂိုလ်ကြီးများ၏ ရုပ်ကလာပ်ကို ဂူသွင်းရာတွင် မိုင်းပွန်စော်ဘွားကြီး၏ ရုပ်ကလာပ်ပါဝင်မြုပ်နှံခြင်းမရှိ ၊ မိုင်းပွန်တွင်သာရှိနေသည် ဟူသော သတင်းများထွက်လာခဲ့ပါတယ်။
သို့လောသို့လောနှင့် လူအများအငြင်းပွားခဲ့ဖူးပါတယ်။ တကယ်တော့ အာဇာနည်ဂူဗိမာန်တွင် မိုင်းပွန်စော်ဘွားကြီး၏ ရုပ်ကလာပ်ပြာများ အမှန်တကယ် ရှိနေပါတယ်။ ဒါပေမယ့် တစ်ဝက်သာ ရှိတာဖြစ်ပါတယ်။
ဤကိစ္စနှင့် ပတ်သတ်၍ မြန်မာ့စွယ်စုံကျမ်း အတွဲ ၉ စာမျက်နှာ ၂၇၄တွင် –
“အလောင်းကို ဗိုလ်ချုပ်အောင်ဆန်းတို့နှင့် အတူဂျူဗလီဟော၌ ထားရှိပြီးနောက် ရှမ်းပြည်နယ်မိုင်းပွန်မြို့သို့ယူဆောင်ပြီး ဒေသအလိုက်ထုံးတမ်းအစဉ်အလာ အခမ်းအနားနှင့် သင်္ဂြိုဟ်ခဲ့သည်။
အရိုးပြာတစ်ဝက်ကို ရန်ကုန်မြို့အာဇာနည်ကုန်းသို့ ပို့၍ ကျန်တစ်ဝက်ကိုကား မိုင်းပွန်မြို့ တောင်ဖက်ကုန်းတွင် အာဇာနည်ဗိမ္မာန်ပြသာဒ် တည်ဆောက်ကာ ထားရှိလေသည်။” ဟုဖော်ပြထားပါကြောင်းရေးသားတင်ပြလိုက်ရပါတယ်။
#Ref:
အမှတ်မှားဆဲ လူသိနည်း မြန်မာ့ဖြစ်ရပ် ၁၀၀ – မောင်ကြည်သန့်
မြန်မာ့စွယ်စုံကျမ်း
#Credit_Org
No comments:
Post a Comment